Types: Topics

Categories: စီမံကိန်းနှင့်ဘဏ္ဍာရေး

agencies: မြန်မာ့အာမခံလုပ်ငန်း

ကိုယ်အင်္ဂါထိခိုက်မှုနှင့်ရောဂါဘယအာမခံ

မည်သူမဆိုမတော်တဆထိခိုက်မှုကြောင့်သေဆုံးခြင်း၊ ကိုယ်အင်္ဂါဆုံးရှုံးခြင်း၊ မသန်မစွမ်း ဖြစ်ခြင်းများ ဖြစ်ပွားပါက ဘဝရပ်တည်မှုကို အထိုက်အလျောက်ဖြည့်စွမ်းပေးသည့် အာမခံလုပ်ငန်း တစ်ရပ်ဖြစ်ပါသည်။

အသက် ၁၆ နှစ်မှ ၆၀ နှစ်အတွင်း ကျန်းမာရေးကောင်းသူများ အာမခံထားရှိနိုင်ပြီး အာမခံ ထားသူ၏ အသက်နှင့် ခန္ဓာကိုယ်သည် အာမခံထားမည့်ပစ္စည်း ဖြစ်ပါသည်။ အာမခံ သက်တမ်းမှာ ၁ လ၊ ၃ လ၊ ၆ လ၊ ၁ နှစ် ထားရှိနိုင်ပါသည်။ အာမခံထားငွေမှာ အမြင့်ဆုံး ကျပ်သိန်း ၅၀ အထိ (သို့မဟုတ်) USD 20000 အထိ ထားရှိနိုင်သည်။ အာမခံထားသူ၏ အလုပ်အကိုင် အဆင့်အတန်း နှင့် ထားရှိ
မည့် အာမခံအကာအကွယ်များအား အဆိုလွှာပါ ဇယား(အေ)(ဘီ)(စီ) အရ ရွေးချယ် စေပြီး ပရီမီယံနှုန်းထား သတ်မှတ်ပါသည်။

အာမခံအကာအကွယ်များမှာ မတော်တဆထိခိုက်မှုကြောင့် ဒဏ်ရာရခြင်း၊ သေဆုံးခြင်း၊ ယာယီမသန်မစွမ်းမှုဖြစ်ခြင်း၊ အမြဲတမ်းမသန်မစွမ်းမှုဖြစ်ခြင်းနှင့် ခြေလက်အင်္ဂါဆုံးရှုံးခြင်းများ ဖြစ်ပွားပါက အကျိုးခံစားခွင့်များ ရရှိနိုင်ပါသည်။ ရောဂါဘယကြောင့် မျက်စိ (၂) လုံး လုံးဝကွယ် ခြင်း၊ ခြေလက်အင်္ဂါ (၂) ဘက် လုံးဝသေသွားခြင်း၊ အဆိုလွှာတွင် ဖော်ပြထားသော ရောဂါ (၅၅) မျိုးကြောင့် ယာယီမသန်မစွမ်းမှု ဖြစ်ပွားပါကလည်း အကျိုးခံစားခွင့်ရရှိနိုင်ပါသည်။ သေဆုံးမှု အကျိုးခံစားခွင့်နှင့် ထိခိုက်ဒဏ်ရာရမှုအကျိုးခံစားခွင့်များကို ဖြစ်ပွားသည့်နေ့မှ (၂) ပတ်အတွင်း တောင်းခံရပါမည်။

ကြိုတင်ရည်ရွယ်ချက်ဖြင့် မိမိကိုယ်ကိုဒဏ်ရာ အနာတရဖြစ်စေခြင်းနှင့် သေဆုံးခြင်း၊ မူးယစ် စေတတ်သော အရက်သေစာနှင့် ဆေးဝါးများသုံးစွဲစဉ် မတော်တဆထိခိုက်ဒဏ်ရာရခြင်းနှင့် သေဆုံး ခြင်း၊ ရူးသွပ်ခြင်း၊ စစ် (သို့မဟုတ်) စစ်အသွင်ကဲ့သို့ ဖြစ်ပွားသောကိစ္စများ၊ သောင်းကျန်းသူများ ကြောင့် ဒဏ်ရာရခြင်း/သေဆုံးခြင်း၊ ရာဇဝတ်မှုကျူးလွန်ရာမှ ထိခိုက်ဒဏ်ရာရခြင်း/သေဆုံးခြင်း တို့ကြောင့် အကျိုးခံစားခွင့်မရရှိနိုင်ပါ။

 ဦးစီးဌာန: မြန်မာ့အာမခံလုပ်ငန်း